李永記貨真價實 童叟無欺

我喜歡Blog多於Facebook的"Notes"。因為，Blog的文章是「集中」的感覺，Facebook是空中投下一張號外，Feed給大眾，快來，更快去。

早幾星期，要到中環的花店訂一個花籃，賀某某喬遷之喜。於網上草草搜集資料，找到「李永記」。她的名字中的「記」字吸引了我，通常甚麼記甚麼記都是地道香港街坊生意。(只是感覺，不一定，鏞記的價錢不太街坊...)

就打電話去，一位女位接聽，說話溫柔，慢條斯理，約六七十年紀。知我要訂花籃，要寫甚麼甚麼，著另一位來聽:「李生，要訂花籃的。」李生提起聽筒，想也是相約年紀。我在話筒的一邊，咀上交待著字條上的地址、公司名、賀語等等，腦中浮現畫面:一位先生，架起金絲老花眼鏡，提斑馬牌木桿原子筆，剛勁有力的行書揮灑在訂單薄上，是面單白、底單粉紅，中間夾過底紙那種。

寫好，著我留信用咭號碼。「我過來付現金給你，不過可能要遲一點時間，請先幫我送花籃過去。」「好，五點前送到。」實情我怕信用咭資料曝光，卻要別人先送花籃，想來也自覺卑鄙，在李先生「易話為」的映襯下，更加顯著。

個多小時後，按地址來到李永記，一如電話中的李太所述:在美國領事館對面，行人斑馬線的對岸。李生李太，一如想像中:頂上斑白，壯健勤快。健談的李太，娓娓道來李永記的威水事(威水史):「上一次呀港督尤德個宴會呀，我哋李永記出最多花呀!」那個上一次，我肯定我還是一分為二，半在老爸跨下，半在老媽肚裡。

「我哋李永記呢，喺度過百年喇!我哋而家係第三代。我哋送花去世界各地都得，香港送去邊都唔使加錢，玫瑰都係兩百蚊一打，節日都係呢個價，賺少少咪得囉，冇咩所謂。你娶老婆未呀?我送紮花俾你求婚吖!我哋喺度好耐，有一次，有個鬼佬熟客嚟買紮花，三百幾蚊，佢擺低張一千蚊就走咗，我追落山找錢比佢，佢塞返俾我話:『Keep the change please!』上一次啊港督尤德個宴會呀，我哋李永記出最多花呀......」

「你哋呢度好好呀，係香港嘅等色，仲有好人情味。」

「你哋要多多支持呀，我哋都係靠各位街坊支持，送貨都係啲街坊幫手車嘅。你下次要送花，打個電話嚟，我哋幫你送咗先，你留埋個地址我哋寄單俾你，之後你過開嚟先俾又得，寄支票或者信用咭都得，我哋做咗好多年咖喇!」

「李太，我哋真係有緣份呀今日，你知嘛，我都係上網搵中環嘅花店，見到有一間咩咩記，覺得特別親切，第一間就打俾你哋喇!」

李太瞪著眼:「係咩!!!哈哈哈!咁就真係緣份呀!!!」一手遞上過膠剪報，不下十篇，中西報俱備。李生相對寡言，說了句「多謝支持，多謝支持!」又匆匆提著一大膠桶的花跑來跑去。

李永記，多謝你在今時今日仍保持街坊生意的形式和心態賣花給我們住在維港另一端的街坊。我要告訴更多「香港村」的街坊，李永記貨真價實，童叟無欺。

李永記，多謝你。

李永記網址: www.leewingkee.com/index.htm